Yvy ha Tymba Ñangareko Motenondehára, karai Carlos Giménez, he’i Tetã Rekuái Pokatuenda ohapejoko rire contrabando, sevói ñotyharakuéra ovirumbyatyveha ko’ágã hembiapo repykuére. Motenondeharakuéra omba’apo gueteri hikuái anivétei oike yva ha ka’avokuéra taha’e tomate ha sevói contrabando rupive.
Giménez he’i ojuhuhague hikuái apañuái guasu ombyaíva sevói mono’õharakuérape; hakatu rog̃uahẽ Mercado de Abasto-pe, Dirección de Comercialización ndive ha rojuhu hetaiterei oĩ sevói.
Yvy ha Tymba Ñangareko Motenondehára he’i: “upe guive roñepyrũ roipe’apaite umi sevói oikéva guive contrabando rupive. Upéva rupi umi ñotỹharakuéra oñemu imba’ekueraitéva 80 mil vosa peteĩteĩ, ha upéicha rupi ovirumbyaty hetave ymaguarégui, ha oñemuiteve hikuái.
Ko’ág̃a guive, sevói ñemuharakuéra ovy’a hembyve viru ivosa repykuére. Ñepyrũrã oñemu kuri 40 mil vosa peteĩteĩ rehe, ha ko’ág̃a katu oñemu 80 mil vosa peteĩteĩ rehe, ha upéva oipytyvõ mbarete ichupekuéra iñemitỹhápe, regadío ha insumo kuéra jejoguápe.
Arapokõindy ohasava’ekuépe oikemo’ã heta tomate contrabando rupive ha motenondeharakuéra ojoko upe tembiapovai. Umi contrabandista oĩva osẽ osapukái, hákatu ñañangarekova’erã ñande productor kuéra rehe.
Yvy ha Tymba Ñangareko Motenondehára ha ambue temimoĩmby oĩva omoirũ ha ombo’e productor kuérape oñotỹ ha ohepyme’ẽ hag̃ua ñande mercado ryepýpe, ha upevarã rohapejokoroína ani hag̃ua oike umi producto contrabando rupive ñane retãme.
